المواضيع الأكثر شعبية
- رسمياً : البلاكبيري مسنجر قادم للآيفون و أجهزة الأندرويد
- خداع بصري رائع (فيديو)
- Manga محل كويتي متخصص في بيع ال MangaShoppu
- مشاكل مع اوربت شوتايم و مع بنك الكويت الوطني
- إنستغرام للأندرويد نزل!
- إعلانات الوطنية
- مجمع الأفنيوز يقدم أقسامه الجديدة
- هلا فبراير 2014 غير
- PEI WEI مطعم
- الآي باد اليديد بالكويت! بأفضل الأسعار! و يوصلك لي بيتك!
(DonMusallam) حسابي في إنستغرام
مدونات أعجبتني
-
كلام الناس7 hours ago
-
Dream Car Update : Mercedes G63 AMG 6×68 hours ago
-
غداً الكشف عن الاكس بوكس الجديدة10 hours ago
-
Will you kill me please !13 hours ago
-
Hello February!4 days ago
-
هل يرحل مورينيو؟؟4 weeks ago
الأرشيف
Tuesday, May 14, 2013
8:03 PM | 
Posted by
Ahmed Al Musallam
السلام عليكم،
قامت شركة RIM بالتصريح رسمياً أن برنامجها الشهير "بلاكبيري مسنجر" راح ينزل على أجهزة الأندرويد و الآيفون خلال الصيف. و راح تقدر تكلم أي أحد يستخدمه أياً كان جهازه. يعني عندك جالاكسي و منزل عليه بلاكبيري مسنجر، تقدر تسولف مع اللي عنده بلاكبيري أو آيفون.
و راح يقدمون ميزة يديدة اسمها BBM Channels وهي شبيهة بالصفحات اللي تقدر تسويها بالفيسبوك. و القصد اهني هي الصفحات اللي تقدر تسويلها Like مو البروفايلات. الناس تقدر تسوي لايك حق القناة مالتك و تتابعك فيها.
هل يعتبر هذا استسلام من الشركة؟ أو خطة تسويقية؟
منو ناطر البلاكبيري مسنجر و يبي يجربه على الآيفون أو الأندرويد؟
Wednesday, May 1, 2013
السلام عليكم
اللي راح أكتبه اليوم، من زمان فبالي، و كل فبراير أفكر فيه. كل ما شفت شصير بالمسيرات أفكر فيه.
و أتمنى أقدر أوصله لكم، مو كأحرف و كلمات، لكن الفكرة نفسها أبيها توصل حق الكل.
شلون طلع لنا "هلا فبراير"؟
طلع من 25 و 26 فبراير صح؟
ما طلع من الماركات، ما طلع من المغنين اللي نييبهم من برا، ما طلع من التسوق، ما طلع من مسدسات الماي..
طلع من حب الكويتيين حق ديرتهم.
شلون قاعد نحتفل فيه؟
"المسيرة"
طبعاً المسيرة كل مالها و تتغير، من سيء الى أسوأ. من التعبير عن الفرحة و الحب للكويت، إلى التحرش بالبنات و الهواش. وايد ناس مريضة تنطر يوم 25 و يوم 26 فبراير عشان يكون عندهم عذر انهم يأذون البنات و يتحرشون فيهم، مثل ما في بنات رايحين حق هالشي أصلأً.
طبعاً انا ما أتكلم عن كل اللي يروحون المسيرة، لكن عن البعض و للأسف عددهم كبير. لدرجة ان في شباب ايونلنا من الدول المجاورة عساس انهم يبون يحتفلون مع الكويتيين بأعيادهم، لكنهم يايين حق شي ثاني، و انا مو قاعد أظن ظن السوء فيهم لكن اهم نفسهم تلاقونهم كاتبين بتويتر ولا بالبرودكاستات مالتهم "رايح الكويت حق البنات" و غيره من شغلات ماله داعي أذكرها. للآسف هذي الصورة اللي بعض شبابنا يوصلها للخارج، بعض الشباب الطايش يبي يكشخ جدام ربعه أو قرايبه اللي في البلدان الثانية فيقول انا أعرف كذا وحدة و الكويت جذي و جذاك...الخ و غيرهم يعزمون ربعهم و يطلعون و يتحرشون بالبنات. طبعاً اعلامنا ما قصر بعد إذا شاف وحدة مكياجها مال عرس نص ساعة يصورها، وحدة سوت شي غلط، ارقصت بالسيارة مثلاً، ما يوخر الكامرة عنها، و بسبت هالشي وايد دول عبالها هذيل بنات الكويت، لكن أغلب بناتنا الحمدلله سنعين لكن لأنهم زينين محد يدري عنهم، لأنهم ما سووا شي يشد الناس لهم.
نكمل موضوع فبراير،
ليش نطنش هالوضع؟
ليش ننطر يسوونلنا شي يغير و نقعد طول السنة نتحلطم ان ما عندنا شي؟
احنا نقدر نسوي كل شي
احنا اللي نغير ما ننطر أحد
بدال هالمسيرات.. ليش ما نسوي شي يوري الناس شكثر نحب هالديرة و شكثر فرحتنا بفبراير؟
شلون؟ أنا أقولكم
شكثر عندنا هوايات و مواهب بالكويت؟
عندنا رسامين،
عندنا مصورين،
عندنا عروض كوميدية،
عندنا ممثلين،
عندنا مغنين،
عندنا عازفين،
عندنا ناس يسوون أشكال و حتى قصص من الظل،
عندنا خفة اليد،
عندنا ناس يبدعون بالطين،
عندنا ناس يبدعون بالنحاس،
عندنا شعراء،
عندنا خطاطين،
عندنا ناس تحب الألعاب،
عندنا مبرمجين،
عندنا كاتبين،
عندنا مدونين،
عندنا ناس ترسم عالويوه و تبدع،
عندنا ناس تحب السياكل و تتفنن فيها،
عندنا ناس إيمعون سوالف مثل العملاء و غيرها،
عندنا سباحين،
عندنا ناس تحب الجت سكي،
عندنا ناس تحب الحداق،
عندنا ناس تتفنن بالتحكم بالطيارات اللاسلكية الكبيرة،
عندنا ناس يعلمون حيواناتهم يسوون سوالف غريبة و تونس،
و وايد غيرهم، يمكن نسيت البعض (آسف!) و في وايد غيرهم ليلحين مادري عنهم، لأنهم ما حصلوا الدعم اللي يطلعهم للناس ليلحين.
مع كل هالهوايات و المواهب، هل نحتاج نييب ناس من برا عشان يونسونا في فبراير؟
أو ان نتيمع كلنا بشارع واحد و قمة الزحمة و نطول المسجلة و تصير مسخرة و تحرش؟
لا طبعاً، نقدر نسوي وايد أشياء.
نقدر نوري المسؤولين ان الكويتيين قدها و يقدرون يسوون أحلى "هلا فبراير"
اليوم 1 - 5، يعني عندكم 10 أشهر تتجهزون حق هلا فبراير 2014. هذي بعض الأفكار اللي عندي اللي تقدرون تاخذونها و تشتغلون فيها،
أو بعد تضيفون عليها أفكار أفضل منها.
تخيلوا معاي، من 1 فبراير 2014، يكون في..
معرض تصوير، كله صور عن الكويت، مو شرط صور بروفشنال، المعرض راح يكون كبير، للمصورين المحترفين و الهاوين و المبتدئين و حتى اليهال، خلهم يعبرون! خلال 10 أشهر لو كل واحد يصورله صورة وحدة، هذا معرض كبير يكون موجود خلال شهر فبراير.
معرض رسم، هم يكون عن الكويت، مو مهمة فيه القدرة على الرسم كثر ما المهم فيه التعبير عن حب الكويت عن طريق الرسم، سواء كنت رسام و فنان، أو عندك ولدك أو بنتك يهال ما يعرفون يرسمون بس حاولوا يشاركون و تبي تونسهم.
مسرح صغير، عالبحر مثلاً، يكون عليه عروض يومية من كوميديين، مغنين، ممثلين، عازفين، ألعاب، مسابقات و خفة يد...الخ، و كلهم كويتيين!
تحديات ألعاب الفيديو، في شريحة كبيرة بالكويت يحبون هالسوالف فيكون عندهم مسابقات بهالأشياء اللي تجذبهم.
اللي يحبون السياكل و مسوين قروب سياكل و جذي، يقدرون يسوونلنا عروض و يتفننون و يستانسون بهوايتهم، و الناس عالرصيف يشوفونهم و يستانسون معاهم،
ماراثون و سباقات على شارع الخليج (مو سباق سيارات)
نطلع كلنا بيوم بمسيرة تنظيف الكويت
مسابقات رياضية، مو بين النوادي لكن بين الناس و الربع، بين اللي طالعين يستانسون، كرة قدم، تنس، أو أياً كان
مسرحياتنا ليش بس بالأعياد؟ ليش ما تكون في عروض كل ويكند مثلاً خلال فبراير؟
في واااايد أشياء نقدر نسويها، و نعبر فيها عن فرحتنا و حبنا حق ديرتنا، و نقدر من ألحين نبدأ التغيير. عندنا 10 أشهر نتجهز فيها.
لا تستثقل السالفة و تحسب ان الموضوع يبيله مجهود و يبيله وقت و وايد ناس...الخ، فكر بنفسك..
مثلاً، إذا تحب الرسم.. ارسملك شغلة عن الكويت، خنقول خلصتها بأسبوع. صدقني مثل ما انت سويت هالشي في مثلك وايد سووه بعد. كل اللي باقي نيمع هالرسومات منكم، و هذا معرض رسومات كلها عن الكويت جاهز خلال اسبوع!
و في شي ثاني بعد، لما يصير عندنا هالكثر شغلات، راح تكون موجودة بكل مكان بالكويت. يعني ماكو زحمة و تيمع بمكان واحد.
في شي بالمهلب، و شي ثاني بمرينا، و ثالث بالأفنيوز، و رابع باستاد جابر، و خامس عند الابراج، و سادس على شارع الخليج، و سابع بمادري وين...الخ
الناس راح يكون عندها خيارات وايد
راح تتوزع
يعني باليوم اللي انت تروح تشوف فيه المعرض، واحد ثاني راح مسابقة حداق، و اليوم اللي عقبه انت رحت تشوف مسابقة الحداق، وهو راح يشوف المعرض...الخ
أتمنى ان فبراير 2014، ما يكون نفس اللي طافوا، و يكون شي نفتخر فيه.
إذا قدرت أوصل الفكرة لكم، و أشيشكم معاي، أتمنى تشاركوني، تعلقون عالموضوع برايكم و أفكاركم، و تقدرون تدزونلي مشاركاتكم بعد عشان أتكلم عنهم مع الوقت في هالحملة، و يشوفونهم المسؤولين و يعرفون ان الكويتيين قدها و ان شاء الله ناوين يخلون 2014 غير. عشان يدعمون الحملة معانا و نحقق اللي نبيه ان شاء الله
تقدرون تتواصلون معاي عن طريق صفحة "راسلني" أو عن طريق تويتر @DonMusallam
موفقين ان شاء الله
Tuesday, April 30, 2013
السلام عليكم
و ردينا بعد انقطااع :-))
و أول بوست راح يكون عن قناة يوتيوب اليديدة :-)
في وايد فيديوات يديدة، و خدع يديدة، و خدع قديمة صورتها بجودة أفضل :-)
و راح يكون في أكثر قريب ان شاء الله.
دايماً مشكلتي مع الفيديوات كانت ان ماكو شخص يصورني بكل وقت، أو ان الشخص اللي قاعد أسويله الخدعة ما يبي يطلع بالفيديو.
و ألحين لقيت حل حق هالمشكلة، عندي فكرة يديدة و راح أطبقها بالفيديوات الياية ان شاء الله. تابعوا القناة و "لايك" اللي يعجبكم هههه، و ان شاء الله بتعجبكم الفيديوات الياية. رابط قناة AlMusallamMagic
Tuesday, February 12, 2013
السلام عليكم
جهاز بلاكبيري Z10 الجديد تصميمه قريب من الآيفون 5، أكثر من واحد شافني و قالي "هذا آيفون 5؟" هههه، للأسف ماعندي آيفون 5 عشان أصوره يمه عشان تشوفونهم يم بعض.
الجهاز طوله 130 ملي، عرضه 65.6 ملي و سماكته 9 ملي، و وزنه 137.5 جرام.
شاشة البلاكبيري Z10 قياسها 4.2 بوصة، والجهاز مافيه أي زر من جدام، مجرد شاشة. عاليمين في دقم الصوت، و من فوق في زر القفل و التشغيل مع فتحة السماعة، و عاليسار فتحة المايكرو يو اس بي و فتحة المايكرو HDMI.
الجهاز فيه معالج ثنائي النواة 1.5 جيجاهرتز، و 2 جيجا رام، ذاكرة داخلية 16 جيجا مع امكانية استخدام كروت اس دي لزيادتها. و طبعاً مع نظام تشغيل بلاكبيري اليديد، بلاكبيري 10. النظام يديد مسوينه من الصفر و معدلين أغلب المشاكل اللي كانت في أجهزة البلاكبيري القديمة. يعتمد النظام على 3 شغلات، الـ Hub، والـ Peek و الـ Flow.
Hub: اهني راح تلاقي كل تنبيهاتك، سواء كانت من البلاكبيري مسنجر أو تويتر أو فيسبوك...الخ، طبعاً لما تدخل عليه تقدر تختار انه يعرض فقط تنبيهات البلاكبيري مسنجر، أو تويتر، أو كل شي مع بعض.
Peek: هي طريقة تخليك "تطل" على الـ Hub عشان تشوف تنبيهاتك بدون لا تطلع من البرنامج اللي انت فيه أو توقف شغلك، تشوف إذا في شي مهم و محتاج ترد عليه أو تكمل شغلك، و إذا كان في شي تحتاج ترد عليه تقدر تختاره، ترد، تخلص، و ترجع تكمل شغلك.
Flow: و هي طريقة النظام للانتقال من برنامج لي برنامج بشكل سلس و سريع، و مصممين النظام عشان تقدر تسخدمه و تنتقل من برنامج لي برنامج باستخدام ايد وحدة.
المتصفح اليديد واااايد سريع حتى في تشغيل المواقع اللي فيها وايد أشياء و معقدة، كل شي يتبطل بسرعة و سلاسة، و فوق هذا يدعم تشغيل الفلاش.
كيبورد البلاكبيري Z10 وايد دقيق، و يعرض الكلمات اللي يتوقع انك راح تكتبها بطريقة يديدة، عشان بدال لا تكتبها تخليه يكملك. يعرض كلمات صغيرة فوق أكثر من حرف، و أكثر كلمة يتوقع انك راح تكتبها يحطها فوق الحرف اللي المفروض تكتبه فيكون جاهز، إذا كانت الكلمة اللي حطها اهيا اللي تبيها كل اللي عليك انك بدال لا تضغط على الحرف، تحرك صبعك عليه لي فوق و راح يحطلك الكلمة على طول، و بعدها يشوف الكلمة اللي انت حطيتها، و يعطيك اقتراحات قبل لا تبدأ بالكلمة الثانية. يعني مثلاً أبي أكتب "السلام عليكم"، لما أكتب "الس" ممكن ألاقي كلمة "السلام" فوق حرف اللام، إذا مسحت عليه لي فوق راح تطلع كلمة السلام بدال لا أكتبها كاملة، و قبل لا أبدأ بالكلمة اليديدة راح ألاقي "عليكم" فوق حرف العين، فعلطول أقدر أضيفها بدال لا أكتبها. و مع الوقت يتعلم على كلامك، يعني بعد جم يوم راح تلاقي الكلمات اللي يحطلك ياها تمشي أكثر من أول أيام و جذي. و ثاني ميزة اعجبتني هي وجود كيبورد ثاني تحت الكيبورد اللي تشوفه، بس شفاف ما يبين، يتحرك على حسب طريقة كتابتك و أخطاءك، يعني يشوف وين تضغط لما بتكتب الحرف الفلاني و شكثر تغلط فيه، و يحاول يحركه لي المكان اللي العادة تضغط فيه عشان يزيد الدقة في الكتابة.
البلاكبيري مسنجر اليديد يدعم مكالمات الصوت، و الفيديو، و فوق هذا أقدر أتصل عليك مكالمة فيديو لكن ما تستخدم الكامرة، تعرض شاشة جهازي. أتوقع كلنا مروا علينا ناس يسألون.. شلون أسوي كذا و كذا.. و نقعد سنة نكتب الطريقة أو نسوي صور للشرح. لكن بهالميزة أقدر أوريك شاشتي و شلون أسوي الشي الفلاني بسهولة. لكن أهم شي صار للبلاكبيري مسنجر هو انه ما يحتاج لاشتراك "بلاكبيري" مثل قبل.. يعني تقدرون تشتركون في أي باقة انترنت من شركات الاتصالات حالكم حال اللي عندهم آيفون و جالاكسي و غيره، أو تستعملونه عن طريق الوايرلس في البيت أو الأماكن اللي فيها وايرلس.
و طبعاً تم تطوير الجهاز ليدعم كثر من البرامج اللي موجودة على باجي الأجهزة، و الألعاب و غيره. مثلاً Angry Birds و غيرها من الألعاب تشتغل عليه. و تم تطوير الكامرة بشكل ملحوظ، و هذي بعض الصور اللي صورتها بالجهاز.
بالأخير انا أشوف الجهاز وايد زين، حلو، سريع، مافيه مشاكل، و لحد ألحين أشوفه أفضل جهاز بلاكبيري نزل، لكن بالنسبة لي أفضل الكيبورد فراح أنطر الـ Q10 ينزل، بعدين أبيع اللي عندي و أشتري هذاك :-)
Wednesday, January 16, 2013
السلام عليكم
تفاجأت بهالفيديو من قدرة القطوة على التركيز في هاللعبة
شوفوا الفيديو :-)
Tuesday, January 15, 2013
السلام عليكم
من أكثر الأشياء اللي شدت انتباهي في CES2013، كانت شاشات سامسونج الجديدة "يوم" "YOUM"
وهي تعتبر شاشات نحيفة و قابلة للطي، يمكن الفكرة تكون غريبة أو يمكن تحطون فبالكم انها فكرة مالها داعي، وانا كان تفكيري جذي بعد
لكن بعد ما شفت الفيديو و الأبواب اللي راح تتبطل من هالنوع اليديد من التكنلوجيا، لقيت انها صج شغلة قوية و لها مجالات كبيرة
أخليكم مع الفيديو
Thursday, December 27, 2012
السلام عليكم
قعدت اليوم ولا ألاقي جيس زين عند باب داري،
طلع فيه رزنامات و معاها كلمات تشجيعية لكل شهر من 2013، و هذي صور محتوياته:
مشكورين شركة "زين" على هالبادرة الحلوة و يعطيكم العافية، و كل عام وانتوا بخير :-)
Subscribe to:
Posts (Atom)
بحث
